ಬೆಳಕಿನ ಹಬ್ಬಕ್ಕೆ ಕ್ಷಣಗಣನೆ: ಅಭ್ಯಂಜನ ಸ್ನಾನದಿಂದ ಬಲಿಪಾಡ್ಯಮಿವರೆಗೆ ಮುಹೂರ್ತದ ಕಂಪ್ಲೀಟ್ ಡಿಟೇಲ್ಸ್ ಇಲ್ಲಿದೆ

ಶಿವಮೊಗ್ಗ: ಕತ್ತಲೆಯಿಂದ ಬೆಳಕಿನೆಡೆಗೆ ಕೊಂಡೊಯ್ಯುವ ನಾಡಿನ ಸಂಭ್ರಮದ ಬೆಳಕಿನ ಹಬ್ಬ ‘ದೀಪಾವಳಿ’ಯ ಆಚರಣೆಗೆ ಎಲ್ಲೆಡೆ ಸಡಗರದ ಸಿದ್ಧತೆಗಳು ಆರಂಭವಾಗಿವೆ. ಧನತ್ರಯೋದಶಿಯಿಂದ ಆರಂಭಗೊಂಡು ಯಮ ದ್ವಿತೀಯದವರೆಗೆ ನಡೆಯುವ ಪಂಚ ದಿನಗಳ ಈ ಮಹಾಪರ್ವದ ಪ್ರಮುಖ ದಿನಾಂಕ ಹಾಗೂ ಮುಹೂರ್ತದ ವಿವರ ಇಲ್ಲಿದೆ.

ಧನತ್ರಯೋದಶಿ ಮತ್ತು ನೀರು ತುಂಬುವ ಹಬ್ಬ (ನವೆಂಬರ್ 7, ಶನಿವಾರ):

ದೀಪಾವಳಿ ಸಂಭ್ರಮಕ್ಕೆ ನವೆಂಬರ್ 7 ರಂದು ಅಧಿಕೃತ ಚಾಲನೆ ದೊರೆಯಲಿದ್ದು, ಮನೆ-ಮನೆಗಳಲ್ಲಿ ನೀರು ತುಂಬುವ ಹಬ್ಬ ಹಾಗೂ ಧನತ್ರಯೋದಶಿಯನ್ನು ಶ್ರದ್ಧಾಭಕ್ತಿಗಳಿಂದ ಆಚರಿಸಲಾಗುವುದು. ಸಂಜೆ ವೇಳೆ ಹಂಡೆ, ಪಾತ್ರೆಗಳನ್ನು ತೊಳೆದು ಸಿಂಗರಿಸಿ, ಗಂಗಾಪೂಜೆ ನೆರವೇರಿಸುವ ಮೂಲಕ ಹಬ್ಬದ ಸಂಭ್ರಮ ಕಳೆಗಟ್ಟಲಿದೆ.

ನರಕ ಚತುರ್ದಶಿ ಹಾಗೂ ಲಕ್ಷ್ಮೀ ಪೂಜೆ (ನವೆಂಬರ್ 8, ಭಾನುವಾರ):

ಹಬ್ಬದ ಅತ್ಯಂತ ಮಹತ್ವದ ದಿನವಾದ ನರಕ ಚತುರ್ದಶಿ ಹಾಗೂ ಲಕ್ಷ್ಮೀ ಪೂಜೆಯು ಭಾನುವಾರ (ನ.8) ಒಂದೇ ದಿನ ನೆರವೇರಲಿದೆ.

ಅಭ್ಯಂಜನ ಸ್ನಾನ: ಅಂದು ಮುಂಜಾನೆ 05:00 ರಿಂದ 06:30 ರೊಳಗಿನ ಶುಭ ಅವಧಿಯಲ್ಲಿ ಎಳ್ಳೆಣ್ಣೆ ಹಚ್ಚಿ ತೈಲಾಭ್ಯಂಜನ ಸ್ನಾನ ಮಾಡಲು ಪ್ರಶಸ್ತ ಸಮಯವಾಗಿದೆ.

ಲಕ್ಷ್ಮೀ ಪೂಜೆ ಮುಹೂರ್ತ: ಅದೇ ದಿನ ಸಂಜೆ ಪ್ರದೋಷ ಕಾಲದಲ್ಲಿ ಮಹಾಲಕ್ಷ್ಮಿ ಪೂಜೆ ನೆರವೇರಲಿದೆ. ಸಂಜೆ 05:45 ರಿಂದ ರಾತ್ರಿ 08:15 ರವರೆಗಿನ ಅವಧಿಯು ಮನೆ ಹಾಗೂ ವ್ಯಾಪಾರ ಮಳಿಗೆಗಳಲ್ಲಿ ಧನಲಕ್ಷ್ಮಿ ಪೂಜೆಗೆ ಅತ್ಯಂತ ಶುಭ ಮುಹೂರ್ತವೆಂದು ಪಂಚಾಂಗಕರ್ತರು ತಿಳಿಸಿದ್ದಾರೆ.

ಬಲಿಪಾಡ್ಯಮಿ ಹಾಗೂ ಗೋಪೂಜೆ (ನವೆಂಬರ್ 9, ಸೋಮವಾರ):

ಕಾರ್ತಿಕ ಶುಕ್ಲ ಪ್ರತಿಪದೆಯಾದ ನವೆಂಬರ್ 9 ರಂದು ನಾಡಿನಾದ್ಯಂತ ‘ಬಲಿಪಾಡ್ಯಮಿ’ ಹಾಗೂ ಗೋಪೂಜೆ ನಡೆಯಲಿದೆ. ರೈತರು ಹಾಗೂ ಹೈನುಗಾರರು ತಮ್ಮ ಮನೆಯ ಜಾನುವಾರುಗಳನ್ನು ಸಿಂಗರಿಸಿ ಪೂಜೆ ಸಲ್ಲಿಸಿ, ನೈವೇದ್ಯ ಅರ್ಪಿಸುವ ಮೂಲಕ ಕೃತಜ್ಞತೆ ಸಲ್ಲಿಸಲಿದ್ದಾರೆ.

ಭಾವ-ಬಿದಿಗೆ (ನವೆಂಬರ್ 10, ಮಂಗಳವಾರ):

ನವೆಂಬರ್ 10 ರಂದು ಅಣ್ಣ-ತಂಗಿಯರ ಅವಿನಾಭಾವ ಪ್ರೀತಿಯ ಸಂಕೇತವಾದ ‘ಯಮ ದ್ವಿತೀಯ’ ಅಥವಾ ಭಾವ-ಬಿದಿಗೆ ಆಚರಣೆಯೊಂದಿಗೆ ಪಂಚದಿನಗಳ ದೀಪಾವಳಿ ಮಹೋತ್ಸವಕ್ಕೆ ಸಡಗರದ ತೆರೆ ಬೀಳಲಿದೆ.